بيدين مرتعشتين ، وتهته وارتباك واضح أثناء السرد، نشر موقع اليوم السابع اليوم ، فيديو آخر لـ ” محمود نظمي” والد طفلي ميت سلسيل القتيلين يعترف فيه بتفاصيل جديدة ومتغيرة للجريمة.
وقال «نظمي» في اعترافات مسجلة بالفيديو خلال التحقيق معه من قبل ضباط مباحث الدقهلية عن تفاصيل الواقعة، قائلًا: «فكرت في الموضوع قبلها بأسبوع، وكان عندي اكتئاب، علشان كنت ناوى أبيع قطعة أرض لكن إخواتي رفضوا وقالوا أسيبها علشان العيال، وهما هيدوني فلوس لما يبيعوا قطعة أرض تانية»، مشيرًا إلى أن «في الاكتئاب اللي كان عندي كنت بخرج أقعد مع واحد صاحبي اسمه رامي، وهو كمان لاحظ عليا موضوع الاكتئاب، وكان بيقولي «في إيه مالك ؟!»، وأنا قررت أبعد شوية عشان محدش يقولي زعلان ليه وكده«.
وتابع: «فكرت أبعد الأطفال ريان ومحمد عن الحياة ومشاكل الحياة، وحسيت إنهم لما يكبروا هيلاقوا صعوبة في الحياة وهيلاقوا صعوبة في مواجهة مشاكل الدنيا، وقولت أرحمهم أحسن وهما لو ماتوا طاهرين هيدخلوا الجنة».
وعن يوم الحادث، قال المتهم: «كان كريم نسيبي في أول يوم العيد جاي ياخد الضحية، وطلع عيّد على العيال، وقالي تعالى، وأنا كنت تعبان ومكنتش قادر أخرج، وريان قالي يا بابا أنا عايز أخرج عشان العيد ومراتي برضه قالتلي خدهم خرجهم وعيّد على نسايبك وكده فقولتلها خلاص«.
وتابع: «روحت عند نسيبي وقعدت معاهم شوية عيّدت عليهم وقعدت معاهم 10 دقايق، وبعدين روحت جبتلهم مسدسات وفسحتهم، وبعدين طلعت على البحر، ودخلت جبت لهم البلالين وكنت واخد (ترامادول) اللي بتعاطاه من 5 سنين، وقعدت على البحر شوية، وواحد بيقولي مش هتاخد مني بلالين عشان الأطفال وكده واخدت البلالين ودخلتهم يلعبوا بالقطر اللي بيلف، وبعدين خرجت وركبت عربيتي واتجهت على طريق المنصورة وقمت لافف بالعربية، وطلعت على طريق الإسكندرية طريق الجمالية ومنها على طريق فارسكور وهناك حصلت الواقعة».
وعن سبب قتل أولاده بهذه الطريقة، قال: «في دماغي إني أرميهم في أي بحر عشان أي جريمة تانية هتتعبني نفسيًا، ولو خنقتهم كنت هتعب نفسيًا، فقلت البحر أقرب حاجة وأسهل حاجة وفضلت أمشي أمشي لحد ما طلعت على كوبري فارسكور، ولقيت ده البحر المناسب والمكان المناسب ومكنش في حد كتير وشيلتهم ورمتهم».
وشرح المتهم جريمته قائلًا: «وقفت بالعربية وشيلت ريان وقلتله روح الجنة يا ريان، وشيلت محمد ورميته وقولتله روح الجنة ومصوتوش ومكنش في حد، ومعرفتش أرميهم مع بعض، وكان فيه ناس قصادي في البر التاني بس مكنوش مركزين معايا، وبعد كده ركبت عربيتي، وكلمت المدام قلتلها العيال مش لاقيهم، وكلمت رامي صاحبي وقولتله أنا مش لاقي العيال دور عليهم وقلتلهم أنا رايح طريق إسكندرية أدور عليهم، وبعدين قفلت تليفوني عشان محدش يكلمني، وبعدين واحد جارنا قالي لازم تبلغ النجدة وكلمت النجدة».
وتابع باكيًا: «الذنوب اللي عملتها قبل كده برضه هي السبب، أنا بشرب (ترامادول وحشيش وبانجو وأباترل) من 5 سنين، وساعات بشرب بـ100 أو 150 جنيه مخدرات في اليوم».
واختتم قائلًا: «الإعدام هيبقى أخف حاجة عندي، وأتمنى القاضي يحكم عليه بالإعدام، وأنا طول حياتي هفضل افتكر ولا أكل ولا شرب ومش هيبقى ليا عين أمشي في الشارع علشان أنا مجرم، وأنا حاسس إن لو حد تاني بيحكي الحوار ده هقوله أنت كافر أنك تعمل كده، ولو اتحكم عليا 100 مرة ميبقاش كتير، والقاضي لو أداني إعدام هيريحني والله هيريحني»، حسب قوله.
